WHAT A FRIEND WE HAVE IN JESUS

By ~ McMuan S. Ngaihte

Zing ninou etlawmtak hong suak in Lamka khuapi a hon tanvak singseng hi. Nidang bang in khua a hoih a, huih te nung hiauhiau in, vasa leh silpak etlawm te’n siamtu phat in a hoih na te uleh a aw te uh a hon suah uhi. Mi khenkhat te’n nidang bang in a nasep na mun uah kuan ding leh a zing na uh sem ding leh a niteng nek zong na lam chiat uah kuan ding in a kisa siausiau ta uhi. Himahleh huai ni chu Rayburn skul naupang te a ding in ni poimoh tak leh kum khat a khatvei tung, ana ngaklah mahmah ni uh “PARENTS DAY” ahia, skul naupang khempeuh a phur chiat uhi. Hiai ni in skul naupang khempeuh in a Nu-leh-Pa te uh skul ah pii in,function thupi tak nei in, kipolh lim na te, thil dangdang leh special item tuamtuam neih a hi sek hi. Hiai te banah skul naupang te a dia hun nuam pen chu a lawm te uleh a classmate te lak uah a Nu-leh-Pa te sepna, a Nu-leh-Pa te hihna te leh amau sungkuan dinmun leh khosak dan gen ahi pen sek a, a Nu-leh-Pa te uh ziak a a kiletsak theih hun uh ahi pen hi.

Skul naupang dang te’n a ngaklah mahmah ni uh himahleh, Mawite a ding in ni ngaklah huai lou pen, a damsung in tung ngei kei lele poi a sak louh ni ahi hi. Ahi tak in zaw a huphurlh mahmah. Zing baihtak a thou in, nidang bang in skul kai ding in a kisa tei a, himahleh nidang a skul kai di a phur sek mahmah mel pen muh ding a om kei. Kitchen ah pai suk in fridge sung ah nek di bangbang a om a chih en in a nek theihtheih ne in, a tiffin di guang zou in, ngui tak in skul lam manoh in a kuan ta hi. Ngui tak a a pai kawm in a lungsim ngaihtuahna zaw a pai sau ngei mai. “Bangchi’n skul ah suanlam ka bawl dia?” “ Bangchi’n ka lawm te leh kaclassmate te’n a ngai di ua?” Nidang bang a a lawm te nuihsan leh chiamnuihna lel di ahi chih thei kawm in nguitak leh dak le dak ngamlou in a pai zom zel a. Huchia nguitak a apai kawm in a theih louh kar in a skul gate uh chu tung ahi ta mai hi. Nidang bang lou tak in tutung zaw a skul uh nai deuh se in a thei hi. Skul huangsung ah a lawm te leh a classmate te a Nu-leh-Pa te utoh nuamtak a omkhawm, a gal lehlam ah skul naupang khenkhat nuamtak a kimawl te thawm ging a za lou het kei a, muh le a mu lou tuan kei. Himahleh a lawm te leh skul naupang dang te huchi bang a nuam tak a a om uh amah a ding in a lunggim behlap tu leh a lawm te a engna behlap tu a himai mah hi. Nuam sa lou tak a om kawm in a kin thei bang pen in skul auditorium lam a zuan ngal hi.

Zinglam dak 10:00 a hih toh kiton in skul auditorium chu skul naupang te leh Nu-leh-Pa te a tu dim ta ua, a khen te thu tuamtuam gen leh a khen te a Nu-leh-Pa te uh kimeltheihsak in a buai laihlaih uhi. Huchia a buai lai un, a skul principal uh Miss Zonun chu a hong ding khiak toh kiton in mipi thawm le a hong dai hiaihiai ta a. Mipi a dai ta maw chi in Miss Zonun in thugen a hon pan ngal a, Nu-leh-Pa te leh mipi hong pai khawm tengteng tung ah kipahthu gen kawm in program teng kimtak in a hon taklang ngal hi. Huchia Miss Zonun in a thugen a zoh toh kiton in skul naupang te’n a hih ding bangbang uh, item tuamtuam te a hon hih ta ua. Huchia item tuamtuam a zoh un item khat chiah in a sam ta hi. Skul naupang tampi te ngaklah mahmah leh nuam a sak hun uh ahia, huai chu bang hiam i chih leh Nu-leh-Pa te introduce na ahi hi. Skul naupang te khatkhat in stage ah kaltou in mipi te mai ah a Nu-leh-Pa te uh introduce na nei in, a sungkuan tanchin te uh, a sungkuan ua hun nuam a zatna te uh a hon ban gen uhi. Huchia a lawm te leh classmate te un hun nuam tak a zat lai un kilkhat ah nguitak in Mawite chu ana tu den a, hithei hileh huai mun a pat leng khiat a mun gamla pi ah om daih a ut tel mai. Thil hithei lah a hi kei ngal a. Stage ah sam le uh bang ava gen dia, ding pih di kua a nei a, a lawm leh vual ten a sungkuan dinmun uh, nuam a sak dan te uh a gen lai un aman bang a gen ta dia. A ngui a, a lungkham mahmah mai a, bangmah hih theih lah a nei tuan kei. Huchi bang lak ah a heutute deihsak na ziak in special number present di lah hi bok si. A lunggimna chu a lehnih in a kibehlap hi.

Huchia Rayburn skul ah parents day zat a hih lai tak in Mawite Pa, Thangpu le zing a thou pan a. Zan nitak a dawn tam deuh ziak in a pengnawng sim lai a, hak chiang thei khol lou in a lupna apat a hong thou khia a, kitchen ah nek di zong in a kivei phei diangdiang hi. Himahleh nek di khat le ana omkei, hehtha suak kawm in a tanu Mawite chu aw ngaihtak in a sam ta hi. A sapna dawng di a om louh tak in a heh mahmah a, kintak in Mawite room ah ava lut a, a va zong hang in a mu tuan kei. A heh luat man in a room sung ah van om teng a paih zak vek a, laibu om teng, a puanthuah teng a paih zak vek hi. Huchia thangpai tak a van teng a pai zak vek lai in Mawite lukham nuai ah a Diary a mu a. A diary kawm etmai in le diary poimoh tak ahi chih a theihtheih mai hi. Huchi’in Pa Thangpu le lupna tung ah tu kawm in Mawite diary chu a en a, huai ni page ah thu tam lou a kigelh a, huai kar ah envelope nih le a om hi. Pa Thangpu in le a tanu diary chu a hon sim ta hi..

“Nu, tuni ka skul uah Parents’ Day lopna nei dek kei ve ua. Ka lawm te leh ka classmate te’n, a Nu-leh-Pa te uh a hon tonpih vek di ua, himahleh ken kuamah tonpih di ka nei kei. Na tanu na hon it kei a hia? Ka lawm te lak ah Nu-leh-Pa tel lou a kava om di na ngai ngam hiam nu aw.? Ka lawm te leh ka classmate te nuihsan a ka om non di hon phal na hiam nu aw..? Nu hon dampih lai hile chin zaw bangkim fel vek di hia maw, mi te eng a om lou di hing a maw. Na hon omlouh san nung ka pa lah sun-leh-zan in zu-leh-sa ne in a kham den a, zu kia ngaihtuah in a hun teng a zang liam a, a chang in kei tak ngial le amah a dia om lou tuk ka hi. Tuni ka skul program uh hilh le ka hilh ngam kei, hilh leng le phattuamna a om ka ging ta tuan kei. Nu hon dampih lai hi le chin zaw maw tuni i sungkuan ua kipak tak a va ki tel thei di hia maw.. ka miss te uh deihsakna ziak in special number present di’n a hon seh ua, nang om hile chin na laa deih mahmah ka Pa heu a va kisa di hia maw. Nu ka hon ngai lua mahmah, tuni chouh na kha in hon kithuahpih hamham in aw Nu aw. Nu aw ka hon ngai lua..”

Huchia a simzoh toh kiton in Pa Thangpu le a pengnawng bang a harlh kuau hial hi. A tanu a it mahmah in hichi khop in maw it tu ding leh enkol tu ding ana poimoh. Himahleh a Pa hinkhua zatdan ziak lel in maw bangmah a gen khiat ngam louh. Kum 3 paisa in Mawite Nu’n a na beisan ta a, huai ziak in khovel ah dam man amah a dia om non lou tuk a kingai in zu-leh-sa ah kibual in a hinkhua ana zang tou hi. Amah a dia a dam man om a tanu tak ngial le it zou non lou hial in a kikoih hi. Innsung Pa’ dinmun len zou lou ahih lam kithei thakthak in a omdan a kisik mahmah mai a. Huchia Mawite diary a sim zoh in envelope chu a hong a, a sung ah Mawite Nu’ damlai a, a sungkuan limlak uh ana om hi. Huai limlak a et toh kiton in dang vual louh in a mittui a luang zoihzoih ta a, huai limlak chu deihthoh tak mai in a tawp ta hi. Huchi’n a khat pen a hon et non leh Rayburn skul, Parents Day function a invitation ana hi hi. Huai zoh kin tak in a room ah a tai lut ngal a, a van neih hoih penpen, Mawite Nu’ toh a kiteng lai ua a silh, a coat suit chu kintak in a silh ngal a, kintak in Rayburn skul lam a delh ngal hi.

Huchia Pa Thangpu le skul auditorium a va tung phet in skul naupang ten introduction ana nei lel ua. Amah le tutna nunglam ah dai tak in ava tu tei ta hi. Sawt lou nung in stage ah Miss Zonun a hong ding non a introduction leh special number pia ding in Mawite min chu a hon sam ta. A khatvei sap na in Mawite a ding khia kei a, thumvei a sap non zoh in Mawite chu a tutna apat in a hong ding khia khongkhong a, awl chikchik in stage lam a hon zuan ta hi. Huchia stage tung ah a hong ding in a mel et mai in le a lungkham leh a mangbang chih a theihtheih mai hi. Gen masak di pen thei zok lou in nuai lam en in a kun charchar a. Mipi te’n le ngak in ana dai sipsip uhi. Huchia dai dide a a ding nung sawt lou in awl chikchik in a aw chu a hong suak a, “Nu aw hon panpih in, ka hon ngai lua..ka hon ngai luamahmah.. kei kia in ka hi thei kei…..”. A thugen mi tampi ten a theisiam kei uh, himahleh a nunglam ah tu a Pa’n zaw a haih het kei. Huchi’n bangmah gen zom thei non lou in a Nu laa deih mahmah 

“WHAT A FRIEND WE HAVE IN JESUS” chu a hon sa ta hi….

What a friend we have in Jesus

All our sins and griefs to bear!

What a priviledge to carry

Everything to God in prayer!

Oh, what peace we often forfiet,

Oh, what needless pain we bear,

All because we do not carry

Everything to God in prayer!

Huchia changkhat a hon sak zoh in, dang vual louh in a muttui a hong luang a, a awm a bing a, a dang a awk a, laa a sa zom thei non ta kei. Sawt lou ki dik hithit a a om nung in a nunglam a pat in guitar awl chikchik in a hong ging a, maksa tak in Mawite in le a en a, himahleh a mu chiang thei kei. A mit nuai in muh chiang teitei a sawm a, guitar ging in a hon naih deuhdeuh tak in a thil muh chu lamdang sak na in a dim ta. A Pa it tak, a naupang lai apat a laa sak teng a guitar ana tum gige leh laa ana sak pih gige chu ana hi maimah hi. Gintak haksa a sa ngei mai. Himahleh a pa a et chiang in zu ngolvei, a tanu thei lou khop a zu-leh-sa ah kibual ahi non ta kei a mithak ahi ta. A biang ah a mittui a lung zungzung a. Pa Thangpu le stage tung ava tung tak in a tanu biang a mittui te a nul sak kawm in a tal a duat tak in a tawp a, “ Bawi, hehpihtak in hon ngaidam inaw…” chih teng kia a gen thei lel. Huchia a om lai un mipi ten bangthu om hiam chih thei lou in ana en heuhou uhi. Huchi’n Miss Zonun le stage ah va pai in, Mawite te sungkuan dinmun leh amau pata hinkhua te mipi theih ding in a hon gen ta hi. Amau pata deihthoh tak a kipom mipi ten a muh un kuamah khasia lou a om non ta kei. Huaizoh in a pata un nidang pek a a Nu damlai a a laa deih mahmah “WHAT A FRIEND WE HAVE IN JESUS” a hon sa zom ua..

What a friend we have in Jesus,

All our sins and griefs to bear!

What a priviledge to carry

Everything to God in prayer!

Oh, what peace we often forfeit,

Oh, what needless pain we bear,

All because we do not carry

Everything to God in prayer!

Have we trials and temptations?

Is there trouble everywhere?

We should never be discouraged

Take it to the Lord in prayer.

Can we find a friend so faithful,

Who will all our sorrows share?

Jesus knows our every weakness;

Take it to the Lord in prayer.

Are we weak and heavy-laden,

Cumbered with a load of care?

Precious saviour, still our refuse

Take it to the Lord in prayer.

Do thy friends despise, forsake thee?

Take it to the Lord in prayer!

In His arms He’ll take and shield thee,

Thou wilt find a solace there.

Blessed Saviour, Thou hast promised

Thou wilt all our burdens bear;

May we ever, Lord, be bringing

All to Thee in earnest prayer.

Soon in glory bright, unclouded.

There will be no need for prayer

Rapture, praise, and endless worship

Will be our sweet portion there.

Mipi paikhawm tengteng tutmun ah tu muang thei om non lou in khut beng thei ten beng in, a hong ding souhsouh ta uhi. Huai ni bangbang a ni kipah huai leh mipi kipak sak Ray Burn skul ah a tung ngei nai kei hi. Kum tamtak amau pata kikar sia pen bawlhoih a hong hi ta.

Laigelhtu laikung pan: Hiai tangthu tomkim pen phuah tawm ahia, min kibang leh hinkhua kibang ana om khak zenzen a leh a gelhtu tup mawng ahi kei hi. A tangthu simnop zawk na di ngim na in a skul min ding in a om khinsa mah kizang hi. Hiai tangthu tomkim sim tu tengteng i Toupa’n hon vualzawl hen la theihsiam na lungsim hon pia chiat hen chih ka thumna ahi gige.

©Siamsinna Leh Vakiangbu

KHOVEL TAWP A CHIH UH KANA CIAMKHA MAWK KACHI…

By ~ Zo Khanthang

Mihing a piangkhe na nana. Pasal kici din chu asia apha theikim nuam mi khat kana hingei hi.. ka hinkhua etkik in a dandan a koih ding hileh step bangzah hiam a pha nenouh sam ding. Ahoihlam le omsam khave. Asia leng omtam mahmah. Ka ngaihsutna ah mihing inchu i duh i deih theihtel theihna rights kinei chi dan in ahoih tampi te kawmkal ah asia tampi kana chiam hi. Kipahna zonna ahi ka chimai a, kanin te ka paipel a. Nuam kasak te ah ka zongsang a. Ka awk kha mun mah mah hi. Ka teirol tung a kana thu deih mah mah “it’s my life”. Hiai ka paipih ngiat ngiat a. Min gense tale uh leng ka utna ah zaw daikaih khum zoh ding kahi samkei hi.

Kum sawm leh cih val bang paisa in ka teenage lut tung in lungsim kikhek leh kochik tak in kana paitou hi. Lawm leng kana hau mah mah a. Asia hin apha hita le uh kangaina vek hi. Pawl 6 ka hih in zu kana chiam khata. Zu bel kha kasa mah2 a lim kasak lam ahih louh ziak in kana avoid thei hi. Hileleng hun nuam ni inbel kana hih cheuh khasek hi.

Tua hunlai mah in lamka leh asehvel a dendrite akithang mahmah hi.kenleng nitak khat ka potna uah lawmte toh teddim road phei ah kadik puunpuun ringot a. Ka lung bang a am ciai2 a nuam kasak lamtak ana himawk hi. Nuamsa kisa in huaituh chimthoina a kazat uh hon suakta maimah hi.. suty niteng toh nitak pottheih hunteng in ka hiip2 tamai uhi. Aman ding bang kithoh khawm in ineih louh hun inleng guzen lou in azuakte kiang bang ah vaki bathei mawk hi.

A lamdang kasa.. a thil hihtheihna,hon peihai a hon bumhai petmah zaw ana himah e ka chi hi. Tulai dan bang a amei apa a ki hiip hilou a. Lawm pasal tetoh a lem nana kazang ua.hanmual tangpi bang nuamdiak hi. (kuaman hon subuai lou)

Kum khat sung bang regular tak a aki hiip nung in ki senior mahmah ta a. Mi tawilai. A hiiplai natawm uh bangle ei a ah ki diiklut sakthei hi. Aksi te ki en veng2 a ki tauhtuahsak keuh2, kainiam suk in aksi bang valh mawk. Lim hia limlou hia cihbel kitheilou ban ah hia aksi kai a valh thei ciang in power nei theita. Mi le magic a kapthei. Kidouthei. Ahiip dangte sunathei cih dan ana hi hi. Khut khawng kiliik vuang2 a, bang chidan hiam a isawm gaih leh aksi or mei am thautang dan a hon pawt in mi vakap kha. Akham dangten le na ana satei mawk uhi. Dragon power, bullet proof cihbang ki silh threpthrop mawk thei hi.

I gen nop pen ahih leh khovel tawpna kana ciamkha mawk hi. A hiipkha ten ithei din kaging. Sun khat lawmte mi nga toh hanmual ah ka hiip ua. Lightning power ka chi ua. Kawlphia dan a round a kizomsak a kana kikantuah lai un van te hon mial a. Leite hon liing a. Kawl te hon phia in van apan pengkul ngaihtak hon ging hom2 hi.kouleng lau in lei ah kabok ta uhi. Huihpi te hon nung in kakiang ua hansuang te bang amut liing luau2 tamai hi. Khua telah mial deuh2. Kawl phe jual2 lak ah puanngou silh totorawt mut te hn lengsuk duam2 uhi. Kakap vengvung ua katai tamai uhi. Ka puansia(dendrite) uh paihciat kana hi ua. Saupi katai nung unleng atheng tuankei hi. Kawl bang om hileh tawmkhe mai di dinmun a ka om laitak un…

Van a kipan aw ngaihtak a mumal kitheilou in hong kikou a. Ka taingam nwnkei a leitual ah kabok a ka liing zung2 tamai hi. Ka taina gim kahih man in. Ka kick hon bei pianta. Khua te hon theng hiau a lawmte gaal ah ana tuike nuih zuazua uhi. Keileng gim kisa pi2 in katai nawn a lawmte omnatan katun inzaw khovel angei ngei mah ana hilai a. Hehtha bang asuak mah2 hi. Huaini a ka taina uh bel kilometer 3 phial bang chimoh tak a kitai sam ahi. Gari hon tai lele ki phulum sak mai din tukhong ka ngaihtuah ciah kakikoih hi.

A lamdan dan ka theikhe naikei.dawi lom ka sung ua hon lut adiam ka ci2 lai hi.huai huntak in suicide na di chance omleh lemtang petmah zaw ana hi maimah hi. Hiai a i gen noptak bel tulai a setan bia a hanmual a khutkhong khekhong liik buam2 a vanlam ente toh kikhiatna omleng kasa hetkei hi..sungte hon sia in mel te hon kikhek a ki vom gimgem zouhial hi. Huaini a kah leh hagawi na ging nua2 teh tukhon ka ngaihtuah ciah ka nuih aza phephulh khazel hi. Maktak leh hihlouh tuak in huaini apan kalau denta hi. Gawtmun gim ana namman zaw ka hive maw kaki chi thethup zel hi.. khovel tawp ana ciamkhol kadiam? Setan in simai dia hon sawl a sihna luiguam lam manoh a tai kadiam cih ka ngaihtuah gige ahi.. kuamah ka advice kei hiaibang hih din…

©Siamsinna leh Vakiangbu

POINA MAH2 E !

By ~ Son Thang

Pastor Howard leh azi Lucy in tanu leh tapa khat Ruthi leh tapa Joel nei uhi.Pastor Howard tuh Pathian thugen in mun tuam2 ah apai kual a,azi Lucy inn ngak in atate toh omkhawm uhi.Ruthi in Class-V leh Joel in III simlel ua, a skul kai na uah vantaang mah2 in, amel uh ahoih ziak in alawm te’n ngaina in deih sakmah2 uhi.Howard zi leng a mel a hoih mah2 mai a, apasal pastor Howard Pathian thu gen a mundang a apai khiak ciah lengla bang nei zeuh2 sek hi.Howard atun kik ciah ana vaidawn dan asiam a, maitak tak leh kipak tak in ana vaidawn zel hi.

Inn kuan kikhop na anei zel ua, a inn kuan un Bible sim in thumna toh hun a zang zel uhi.Howard tuh missionary dan apastor a om ahih man in thugen di in mun tuam ah apai khe zel hi.Hucimah bang in Howard tuhmun dang a Pathian thu gen a azin khiak a ngai nawn a, azin dekin kikhop na nei inn azi atate ngaimah leh Pathian adia a hat na ziakin khelah pi2 in azin khiak santa hi, . Azin nung kal khat leng pai nailouin Howard zi va heel zel Samdividson leng ava pwt zel2 hi. . Lucy tuh a melhoi a a kasiam mah2 ziak in mite’n angai thei mah2 mai uhi. Hucia Samdavidson ava pawt zelpen ataten zadah ua. . .himah lehAnu uh Lucy in dai di’n akhou zel hi. . . Hiai car ngou hek a Lucy vaheel zel pa’n tuh Lucy angai mah2a, Nupi ahih lam thei gegu napi in azi ding in a en lah ta mai a, apawt ciang bang in atate nektheih ding bang apuak zel a, Lucy ngeiin leng angai gwp ta hi. .

A pasal omlouh tuh paze sa in inn kuan kikhopna aneihte uh nei ngei nwnlou in a om mai mah ua( Howard in athu thei leh cih huai na tel e),nikhat Samdavidson apwt louh ciang in leng a om lem theilou in aheh tha kia suak a, atate bng taimawk2 sek hi. Sun khat Samdavidson in Lucy luia ki sil ding car in zawn a, Lucy inleng atate in ngak din nusia in car in kipawkhe ta uhi. Lui luang atun un kisil ding in kisa ua, lui mun a om te’n Lucy amuh ciang un maksa thei mah2 mai ua, akihouna u tuh Pastor Howard zi leng apasal om louh kala tangval ngai hi di a cikheukhou uhi. Lucy hong kisuah a, a Puanaknuai san dup toh hong om bang tuh a mukha peuh in duangcing sa in a en lah thei mah2 uhi. Luiluang ah hong kisil khawm ua, lui lak a a om khop ciang bng un atak sa uh kimantuah abang se hi. , lui ami dang om teng lamdang asa mah uh. . .Ki sil khin in lampai din ki sa ua, Samdavidson gari a kipaw khia in Lucy a inn ua khalou in apaw suak a. . . . . .
( End of part – I )

Part – II

Samdavidson in a inn uah tonpih a, anu bang ana kipak mah2 in singpi khong ana dawn pih hi. Samdividson in a Room ah kailut in Sum pia a, nupa loupi in akipolh pih tamai hi. Tua hun nitaklam ahi a, Lucy leng a om suakding hi salou in nitak khomuikuan in kikha sak hi. Hiai hun in atate’n an ana ne khin in lai ana sim ua ,anu uh amuh un dah meltak in om uhi. Anu uh Lucy leng room ah lutsuak in kingaih tuah2 mai hi. Apasal khen a Samdavidson kiang a paimai a ut ta hi.

Nitam lou nung in Pastor Howard hong tung a, azi nidang toh a om dan na kibang lou in mak a sa mah2 mai hi. Himahleh thu bel a kan sau kei ( muang moh naciang chu anei ). A tate’n le bangmah a gen tuan sam kei uhi. Nitak hun in kikhop na anei non ua, Howard in Lucy Bible sim a thumna nei din sawl mah leh Lucy a ut kei a, ata nu uh Ruthi a sawl sawn hi.

Pastor Howard om ciah chuh Samdavidson ahoh ngam tuansam kei. Ngei na bang in Howard tuh munkhat a cialpi na ah thugen din sap in om nawn a, azi leh a tate toh hoh sawm mah leh azi Lucy in a nial ziak in amah kia ava hoh ta hi. Howard a zinkhiak nawn tak in chu Samdavidson a tung nawn a, huai nitak in tuh kua mah khual se2 lou in atate melhoi takte apasal omlouh kal in a paisan in , Samdavidson azui ta hi.

Ni 4 nung in Howard cialpina thugen locing tak a zou in kipaktak in inn lam azuan a, inn a tun ding zaw thei leh phur hetlou di hia maw !. Inn atung in chuh atate kap nelh2 amu a, aman leng atate kiah ‘Nanu u la?’ a cìh leh Ruthi in apa kawi a kap kawm in ‘Pa kanui hon taisan’ cin a gen ta hi. Howard tuh a kingaihtuah vung2 a, ‘POI NA MAH2 E ! ‘(Title lak khiakna) ‘ ci kawm in, Boite, Pathian muang in kalsuan ni, na nu’n hon taisan leleng enzaw Toupa na i sem ding uh a ci hi. Ahehnem theihna om sun. Nitak in atate a imu sak a, amah tuh a kingaih tuah2 mai hi . Pathian na sep di bang a liin mah2 ta. . .Aziak ahihleh a zi’n tai san a, a tate kuan enkol ding ! Himahleh Pathian kiah thum in thathak la in Pathian thugen a vakzom zel din a kihaciam hi.

Hun leh nite pailiam zel in Howard tuh South Africa a mivomte lak a thugen dia sawl in om a, atate toh South Africa zuan in apaita ua, hiai a lam paiman Missionary team apan sum pai ahi. Amun atun tak un a Quater ding uah a paingal ua. Gintak sah mivomte ana siam mah2 ua, Africa a pastor om ten ana vaidawn in Singpi dawn khawm ua. A tun nitak uh amah laklutna dan programe thupitak kibawl hi. Huai nitak chuh fuh deuh a ki dress in atate toh a kikhwm ua. Kikhopna ah thu hon gen a, a thugen na ah a zi in zulhzau tak a , a paisan thu tel hi. Mipi sangtampi paikhawmte lak ah milian leh hausa pipi tel ua. Africe a mihausa leh minthang mah2 Coal-mine khuuk tampi neitu tanu melhoi mah2 Christina in Howard hoih a na sa a. . . .
( End of part-II )

 Part-III. . .

Kikhop tawp in Howard chibai ut te Biakin kong ah ana kivual in, huaite lak ah Christina te innkuan leng ana ki line sam ua, amau mihausa hi mahle uh Atanu hawmthoh uh ut ziak in apate’n leng kiline in chibai ana buk samuhi. Howard in leng Christina amuh in hoi asa mah2 mai hi. . .Huci in kikhwm tawp in mi avengta ua,amau leng inn lamzuan in khein apai ua, Christina te tuh car in akikhoh han2 uhi.

Tua South Africa mun a Pathianthu gen a om den phot ding in missionary team te apan lai amu a, akipak mah2 mai hi. Aziak ahihleh Africa mite asiam mah2 ban uah tua nungak nou Christina athei ziak ahi. Christina in hun awl aneih ciang in hih di poi mawh om hileh kilawm in Howard te inn ah ava hoh zel a, ataten leng angaina mah2 mai uhi. Ahi a Christina tetoh teh in amau tuh Pathian nasem ahih na uah anei zou lokei ua, a inn uh ava hoh ciang bang in ana kisuanglah thei mah2 mai hi. Mission nasepna a sum apoi hoilouh man in Howard in atate skul kaisak nwn louh sawm a, himahleh Christina in akai na di uh sum pia in akaisak nwn hi. . .

Nikhat Christina in Pastor Howard te a inn ua an ne din a cial a,himahleh Howard in nial nilouh a,atawp in ‘AW’ khng2 hi. Christina inle apa kiah agen leh ana kipak mah2 hi. Hoitak a ki chei in Christina te inn ah an ne dia hoh din akisa ua, akisak laitak un Christina a Car wa pii din ava tung man hi. A hong taikhe ta ua, lampi ah thakhat in Howard ta Joel in garihek kham khol sak a, kum in lamnawl a suah dur te ava zut han2 a ,Christina in Howard kiah bng ziak a ci a akan leh ana sep na dia vanzat dia en lah ahi ci in adawng hi.Christina in vasam in nasem lou a skul hoitak a kai sak ding ahihdan hlh in atai khen nwn uhi.

A inn uh a tung un chu a pate ana siam in ana vaidawn hoih mah2 uhi. Christina in Howard tate akimwl na duh vante pia in nuamsak tak in ava om ua. Himahleh Howard tuh kisuanglah na in adim hi. Nitak ann nek hun ma in kihahsiang ua, Christina leng kisil khin avan a kidres lai Howard tate’nana mu ua, hici bng a nungak hoih leh duangcing ka mu naikei aci zozen uhi. Nitak an ne khin a pa toh Howard aki houkal un Christina in Ruthi leh Joel a room ah om pih in van tuam2 amau adia aleite pia a, akipak mah2 uhi banah gold zungbuh Ruthi pia a, himahleh Ruthi in sang nuamlou in ‘ kou inkuan in zaw hi ci bng thil manpha ka phukei uh, nawn deih sak a,ka kipak’ ci hi. Himah leh Christina in ken adang leng kaneilai a, hiai nang bun in a ci a ape tei2 hi. Christina in Ruthi kiah na pa uh amelhoih lua, ka pasal di’n hon pe ve ua ci a ciam nui a nul kawm a gen nap2 leh Ruthi in leng ka pa un leng nang ngai a hon ngai eive a cihleh Christina tuh kipahna in adim a, . .Nitak khua muita ahih man in apai uh ahunta a, Christina in car a a intan uh va kha in kikhe lah tak in akikhen nwn ta uhi.

In a tun un kikhopna nei khin in lum ua, alup kawm un Howard in atate kiah Christina in angaih leh azi dia nei mai ding ahih dan a hlha, ataten lah angaih lam atheihsa ahih man un akipak mah2 uhi. Christina ngei in leng apa kiah Pastor Howard toh kiteng ding ahihdan hlh in apate’n le ata nu khat neih sun ahih na ah anial kei uhi. Howard in va hel in. . . .Huci in Missionary team leh Pastorte kiah zinei dia phalna ngen masa hi. . Zi in zulhzau san a, pasal dang aneih san leh apasal in zidang amuh leh neithei ding,angkawm hlou ci in phalna pia ua. .Huci in akiteng na duh thil teng saifel in akiteng ua, akiteng ni u tuh Africa a mi minthang mah2 tanu khat leh Pastor kiteen na ahih manin mi atam mah2 mai hi.

Kiteng khin in Pathian thugen a Africa mivom dawibe te lak apai a ngai a. . .azi toh atate teng toh tua mivom, dawi bete lak ah Pathian thu gen din akuan khe ta uhi. ( Howard zi Christina leng Pathian nasep lunglut ahih na ah akituak mah2 uhi.) Mivom, dawi bete lah a apai na leh athil tuah te ……………….

End of part-III

Part-IV.

Howard te Africa a ginglou,dawi bete lak a thu gen di’n kuan ua, tua a kuanna d uh khua a Hausa pu kiah paiin Pathian thugen theih dia phalna va ngen uh hi . Himahleh Phal sak hilou a. . .Howard te’n leng a khua ua giak di’n phalna ngen ua, phal sak in A hausa pu un bukkhat a giak sak hi.

Nitak ciah a giah buk uah a hausapu’n un dawisiamte Howard te that sak din thu pia a, dawisiamte’n leng nitak in gul a giahna mun uah va khah uhi. Himahleh Howard zi in a lup ma un powder a giak buk uah theh a, huai powder ziak in a gul te va luttheilou in suak ta ua, a zinkar in a Hausa pu un dawisiam te tailoh. A ziak Howard te a sihlouh ziak un. Ahi a, thugen thei dia phalna amuh louh ziak un Howard te a kik phot uh a ngai ta, akik tak un Hasapun a that di mi delh sak nawn. Himahleh a that dia asawl te’n a delh lai un huihpi, vuah pi’n buaka, Howard te om na lam chu khua leng selou in a delh te’n a delhmong nawn uhi.

Nitam lou nung in Howard te leng tua mun a thugen thei dia phalna mu in Pathian thu chu a va gen ua, mitampi te piangthak in a nasepna uah loh cing mah2 ua, missionary team apat kipah pihna thu te mu zung2 uhi. Amau huai mun ah azi Christina pate panpihna in tagah kepna khat hong ua. Mikìhhuai, nu le pa neilou te’n ann khwng pia uhi. Nikhat atagah khoite lak ua khat in suangvom mu a, la in Christina kiah atawi leh tua suangvom pe’n Molöng(black diamönd), amanpha mah2 ana hi a, Howard zi in apa te kiah zuak dia pia in huai apat atagah kep na uh sumle pai ah kiningcingtak in om ta hi. Kumkhat val om nung un amau leng atha uh khek ding mi om ahih man in inn lam ah kik phot di’n kisa uhi.

A zilui Lucy leng apasal Samdavidson in asih san pah a,amah leng a inn ua om2 lemsa lou in apaikhia hi. Nungak melpu lai in amelhoi mah2 lai hi. A sep di dang omlou ahih man in a tawp in Bar ah a sem ta hi. Bar a a sepna mun ah leng a melhoih ziak in a managerte deihsakna te tang hi. A manage te na ngawn un enlah in sumpia in a ut2 un a kipolh pih mai ta uhi.

End of part-IV

©Siamsinna leh Vakiangbu